Gjykata e Posaçme ka miratuar kërkesën e SPAK për zgjatjen me tre muaj të afatit hetimor ndaj ish-deputetit të Partisë Socialiste, Jurgis Çyrbja.
Vendimi u mor pas seancës së së martës, ku përfaqësuesit e Prokurorisë argumentuan se kanë ende në pritje disa përgjigje nga letërporositë e dërguara drejt agjencive partnere jashtë vendit.
Nga ana tjetër, avokatët mbrojtës kërkuan kohë për t’u njohur me dokumentacionin e paraqitur nga SPAK, para se të shprehnin qëndrimin e tyre.
Çyrbja u arrestua në tetor të vitit 2024, vetëm pak ditë pasi dha dorëheqjen nga mandati i deputetit që mbante prej vitit 2017 në qarkun e Durrësit.
Sipas SPAK, ndaj tij janë ngritur tre akuza: “Korrupsion aktiv në zgjedhje”, “Përkrahje e autorit të krimit” dhe “Tregtimi i sekretit shtetëror nga shtetasit”.
Këto vepra penale parashikojnë dënime që variojnë nga gjobë deri në shtatë vjet burg, sipas dispozitave përkatëse të Kodit Penal.
I njohur edhe për lidhjen e emrit të tij me rastin e pronës “ish-Hotel Vollga” në Durrës një pronë që ka qenë në qendër të interesit të Emiljano Shullazit, Çyrbja ka një karrierë të shpejtë në administratë.
Ai ka përfunduar studimet në vitin 2010 dhe tre vite më pas u emërua drejtor i Hipotekës së Durrësit, përpara se të zgjidhej deputet në 2017.
