Një prej kapitujve më të suksesshëm të sportit shqiptar është drejt fundit. Lara Colturi, talenti i madh i skive alpine që garonte me flamurin kuqezi, ka kërkuar zyrtarisht rikthimin në vendin e saj të lindjes, Italinë.
Historia e Colturit me Shqipërinë nisi rreth katër vite më parë, kur mbërriti si një adoleshente me një emër të njohur pas vetes nëna e saj, kampionia olimpike Daniela Ceccareli. Bashkë me Federatën Shqiptare të Skive, ato nisën një rrugëtim që do të transformonte fytyrën e sportit dimëror në vend, por edhe në Europë.
Rezultatet nuk munguan: tre podiume në Kupën e Botës vetëm këtë sezon, vendi i 7-të në Botëror dhe një profil që po rritet dita-ditës në arenën ndërkombëtare.
E ndërsa ylli i saj po ngjitej, në Itali mungon një emër i fortë për të përfaqësuar vendin në Olimpiadën Dimërore Milano-Cortina 2026. Dëmtimi i kampiones Frederika Brignone e ka lënë Italinë pa një pretendente të fortë, dhe Lara Colturi shihet si pasardhja ideale.
Në këtë pikë, në lojë hyn edhe buxheti. Me mbi 70 milionë euro të dedikuara për sportet dimërore, Italia ofron një mbështetje që Shqipëria, pavarësisht përpjekjeve nga qeveria apo bashkia e Tiranës, nuk ka mundur ta përballojë.
Dhe kjo ka qenë, sipas burimeve pranë Komitetit Olimpik, pika që ka tensionuar marrëdhëniet mes familjes Colturi dhe Federatës Shqiptare të Skive.
Megjithatë, transferimi nuk është i thjeshtë. Rregullorja e Federatës Ndërkombëtare të Skive parashikon që një sportist nuk mund të ndryshojë federatë pa miratim dhe, nëse Colturi largohet pa leje, ajo do të penalizohet me një vit pezullim nga garat dënim që do ta mbante jashtë Kupës së Botës dhe Lojërave Olimpike të vitit 2026.
Afati për të vendosur përfundimisht është 1 maji, kur Komiteti Ekzekutiv mbyll dritaren për transferimin e sportistëve.
Deri atëherë, e ardhmja e Lara Colturit mbetet pezull dhe do të vazhdojë të garojë për Shqipërinë, apo do të rikthehet nën flamurin italian? Vendimi do të peshojë shumë jo vetëm për të, por edhe për sportin shqiptar.
