Hetimet e Antiterrorit vazhdojnë jashtë zyrave të kompanisë “Hellenic Train”, pas shpërthimit të ndodhur mbrëmjen e djeshme, rreth orës 21:30.
Një telefonatë anonime në një gazetë dhe një faqe interneti paralajmëroi se një bombë ishte vendosur pranë zyrave dhe do të shpërthente brenda 35 minutash.
Lënda shpërthyese, e vendosur në një çantë shpine me dry, shkaktoi dëme materiale në katin e ndërmjetëm të ndërtesës si dhe në disa makina të parkuara.
Ekspertët e Antiterrorit vijuan punën në vendngjarje deri në orët e para të mëngjesit.
Policia greke dyshon për lidhje të mundshme me një tjetër incident të ndodhur më 3 shkurt, përballë Ministrisë së Punës, për të cilin përgjegjësinë e mori grupi “Vetëmbrojtja e Klasës Revolucionare”.
Edhe në atë rast u përdor një bombë e fshehur në çantë shpine dhe u bënë dy telefonata paralajmëruese me afat shpërthimi prej rreth 40 minutash.
Sipas deklaratës zyrtare të kompanisë Hellenic Train, shpërthimi nuk ka shkaktuar të lënduar mes punonjësve apo kalimtarëve dhe dëmet materiale janë të kufizuara.
