Detaje të reja kanë dalë në dritë lidhur me vrasjen e 22-vjeçares shqiptare në Itali, Ilaria Sula, e cila u raportua e zhdukur në fund të muajit mars. Sipas hetuesve italianë, autori i dyshuar, ish-i dashuri i saj, 23-vjeçari Mark Samson, ka vepruar me qetësi dhe gjakftohtësi të jashtëzakonshme pas kryerjes së krimit.
Gazetari italian Emilio Orlando, në një intervistë për Euronews Albania, deklaroi se Samson e kishte hedhur trupin e pajetë të Ilarias nga një shpat mali, duke llogaritur me kujdes çdo hap që do pasonte. Ai shtoi se pas krimit, i riu ishte kthyer menjëherë në një gjendje normaliteti të frikshme, duke u takuar madje me një shoqe të Ilarias dhe duke konsumuar një vakt me të, ndërkohë që shprehej i shqetësuar për mungesën e saj.
Sipas Orlandos, hetimet kanë zbuluar se përveç nënës së autorit, e cila ka pranuar se e ka ndihmuar të pastrojë gjakun pas vrasjes, janë identifikuar edhe dy persona të tjerë që dyshohet se kanë bashkëpunuar me të. “Një gjë është e qartë,” tha ai, “qelizat telefonike të autorit dhe viktimës kanë dhënë të dhëna të rëndësishme. Mark Samson ishte ndaluar më 1 prill, pesë ditë pas zhdukjes së Ilarias, së bashku me dy miq të tij që mund të kenë ndihmuar për të devijuar hetimet.”
Ai shtoi se gjithçka është dukshëm e planifikuar nga Samson, përfshirë gjetjen e një alibie pas krimit. Megjithatë, plani i tij kriminal është zbuluar nga policia italiane, edhe pse hetimet vijojnë dhe mbeten ende shumë pikëpyetje, veçanërisht lidhur me rolin e të dyshuarve të tjerë që mund ta kenë ndihmuar në këtë ngjarje të rëndë.
