Pas një jave kërkimesh intensive, policia italiane ka gjetur trupin e pajetë të 22-vjeçares shqiptare, Ilaria Sula, e cila ishte zhdukur më 25 mars në Romë.
Mediat italiane raportojnë se trupi i saj u zbulua mëngjesin e së mërkurës në një zonë të pyllëzuar pranë komunës së Polit, në periferi të kryeqytetit italian. Viktima ishte futur brenda një valixheje dhe ishte hedhur në fund të një gremine.
Ilaria jetonte në lagjen Furio Camillo të Romës dhe ndante apartamentin me disa shoqe.
Ajo ishte studente në Universitetin La Sapienza. Natën e zhdukjes, kishte shkëmbyer disa mesazhe në WhatsApp me shoqet e saj, por më pas telefoni i saj u fik, duke ngritur shqetësime te familjarët dhe miqtë.
Denoncimi për zhdukjen u bë në komisariatin e San Lorenzos, çka çoi në nisjen e hetimeve nga policia italiane. Aktualisht, autoritetet po ndjekin një pistë hetimi që përfshin ish-të dashurin e 22-vjeçares, një shtetas nga Filipinet, si person të dyshuar.
Hetimet vijojnë për të zbardhur plotësisht rrethanat e ngjarjes dhe për të identifikuar e arrestuar autorin ose autorët e krimit.
