Një ngjarje e rëndë ka ndodhur mesditën e djeshme në kryeqytet, ku një 24-vjeçare e huaj është gjetur e vdekur në një apartament të marrë me qira, dhe dyshohet se është vrarë nga partneri i saj.
Çifti palestinez, Ryyan Alwan, 24 vjeçe, dhe bashkëshorti i saj, Fadi Alwan, 49 vjeç, të cilët jetonin në Gjermani, mbërritën në Shqipëri më 19 shkurt.
Ata janë prezantuar dokumente greke në kontrollin e pasaportave në aeroportin e Rinasit dhe më pas udhëtuan me taksi drejt zonës së rrugës së Kavajës, ku morën një apartament me qira.
Policia ka shqyrtuar kamerat e sigurisë dhe ka zbuluar se më 22 shkurt, 49-vjeçari është filmuar duke u larguar nga zona, dhe po atë ditë është larguar drejt Greqisë.
Grupi hetimor dyshon se krimi ka ndodhur në të njëjtën ditë, kur partneri i 24-vjeçares, pasi e dhunoi dhe e vrau me thikë, e mbuloi me një çarçaf, mori dokumentet e viktimës dhe çdo send personal, dhe më pas u largua nga Shqipëria.
Arsyeja e udhëtimit të çiftit palestinez në Shqipëri ende nuk është e qartë, dhe një tjetër dyshim për hetuesit është fakti se ata nuk kanë dorëzuar dokumenta identifikimi tek pronarët e apartamentit që kishin marrë me qira.
