Kryetari i Industrisë së Turizmit të Sarandës, Arben Çipa, ka dalë me një reagim të fortë pas lirimit të Dioment Musës, personit që e dhunoi brutalisht dhe u la i lirë vetëm 48 orë pas ngjarjes.
Në deklaratën e tij zyrtare, Çipa shpreh zhgënjim të thellë me vendimin e marrë nga prokurorja dhe gjyqtarja, duke theksuar se ky vendim ka shkaktuar mosbesim të gjerë në komunitetin e Sarandës. Ai nënvizon faktin se si Dioment Musa, ashtu edhe Markelian Musa, janë persona me rrezikshmëri të lartë shoqërore dhe historik të mëparshëm kriminal.
“Ky pretendim nga prokurorja dhe ky vendim nga gjyqtarja në fjalë kanë ngrirë shpresën e qytetarëve të Sarandës, konfirmuar kjo nga reagimet në rrjetet sociale për mostrat të cilët janë me precedentë penalë nga e shkuara, madje njëri prej tyre është shpallur në kërkim”, shkruan Çipa në reagimin e tij.
Biznesmeni ngre një pikëpyetje serioze lidhur me faktin se si mund të lejohet lirimi i një dhunuesi kur bashkëpunëtori i tij është ende në kërkim nga autoritetet. Ai shpreh dyshime se ky lëvizje mund t’i mundësojë të dyshuarit komunikim më të lehtë me personin në arrati.
Reagimi i plotë:
“Ky pretendim nga prokurorja dhe ky vendim nga gjyqtarja në fjalë kanë ngrirë shpresën e qytetarëve të Sarandës, konfirmuar kjo nga reagimet në rrjetet sociale për mostrat të cilët janë me precedentë penalë nga e shkuara, madje njëri prej tyre është shpallur në kërkim.
Lind pyetja: Si mund të lihet i lirë dhunuesi, kur bashkëpunëtori i tij është akoma në kërkim? Apo u la i lirë për të komunikuar dhe vepruar lehtë dhe në koordinim me personin në kërkim?
Interpretimi i sakte ligjor për situatën në fjalë vijon si më poshtë:
Nëse organi i procedimit e ka regjistruar procedimin penal për plagosje të rëndë dhe deri në caktimin e masës nuk ishte administruar akti i ekspertimit mjeko-ligjor, nuk është vepruar korrekt për masën e caktuar. Në rastin konkret, personi paraqet rrezikshmëri shoqërore të lartë, ka qenë evident rreziku i ikjes dhe shmangies nga procedimi penal që zhvillohej në ngarkim të tij, si dhe për efekte të parandalimit të përshkallëzimit të situatës ndërmjet palëve, duhej ta kishin lënë në arrest në burg (qoftë dhe me afat 15-20 ditor) deri në administrimin e aktit të ekspertimit.”
