Mungesa e theksuar e mjekëve specialistë në spitalin e Bajram Currit ka detyruar banorët e zonës të kërkojnë shërbime shëndetësore në spitalin e Gjakovës, si për kontrolle rutinë ashtu edhe për ndërhyrje kirurgjikale.
Banorët e zonës shprehen të shqetësuar për situatën. Një e moshuar tregon se në mungesë të shërbimit mjekësor në Tropojë, zgjidhja e vetme mbetet spitali i Gjakovës, ku mjekët ofrojnë shërbim cilësor. Ndërsa një tjetër banor shton se hapja e kufirit ka lehtësuar qasjen në shërbimet shëndetësore të Gjakovës, duke theksuar se atje çmimet janë më të ulëta dhe cilësia më e lartë.
Kujtim Rexha, drejtor i spitalit të Tropojës, konfirmon problemin e mungesës së stafit mjekësor. Pavarësisht kërkesave të vazhdueshme drejtuar Ministrisë së Shëndetësisë për specialistë në kardiologji, pediatri dhe reanimacion, situata mbetet e pazgjidhur.
“Gjatë shkurtit kemi pasur fluks të lartë pacientësh për shkak të virozave dhe rasteve me Covid-19. Përballemi me rreth 70 urgjenca në ditë. Rastet e rënda i referojmë në Gjakovë ose Tiranë. Bashkëpunimi me spitalin e Gjakovës është shumë i mirë dhe mesatarisht 5-6 pacientë në ditë marrin shërbim atje,” shpjegon Rexha.
Aktualisht, spitali që mbulon nevojat e 30 mijë banorëve të Tropojës, funksionon me vetëm 9 mjekë, ku 5 janë të përgjithshëm dhe 4 specialistë. Për të përballuar fluksin e pacientëve, institucioni ka angazhuar edhe mjekë pensionistë.
