Kryetari i Partisë Demokratike të Kosovës, Memli Krasniqi, së bashku me bashkëshorten e tij, votuan në një shkollë fillore në Prishtinë.
“Sot është një ditë e mirë, një ditë e madhe, e rëndësishme për vendin dhe demokracinë e Kosovës. Sapo votuam, me besimin e plotë për të ardhmen e qytetarëve tanë, besoj se kjo ditë duhet të shfrytëzohet nga çdo qytetar që ka të drejtë vote. Jam besimplotë, se ashtu sikurse kemi pasur fushatë pozitive, edhe vota do ta thotë të njëjtën”, tha Krasniqi.
Ndërsa, kandidati për kryeministër i Lidhjes Demokratike të Kosovës dhe kryetari i kësaj partie, Lumir Abdixhiku, votoi në shkollën “Faik Konica” në Prishtinë, duke e shoqëruar këtë moment me gruan dhe dy vajzat e tij.
“Është ditë e mirë, është ditë e bukur, është ditë e demokracisë. Në këtë ditë të demokracisë ftoj të gjithë qytetarët e Kosovës që të marrin pjesë masivisht në vendosjen e fatit të tyre për 4 vitet e ardhme të tyre dhe të Republikës së Kosovës. I uroj të gjithë votuesit që për herë të parë në këto zgjedhje japin votën për të ardhmen e Republikës”, tha Abdixhiku.
