Një pamje shqetësuese po shfaqet në peizazhin arsimor europian, ku pagat e mësuesve të përshtatura me inflacionin kanë shënuar rënie të ndjeshme në disa vende kryesore, përfshirë Anglinë, Irlandën dhe Italinë.
Sipas raportit të fundit “Education at a Glance 2024” të OECD-së, në 10 nga 22 vende dhe rajone të analizuara, pagat reale të mësuesve të arsimit bazë dhe të mesëm kanë pësuar rënie gjatë periudhës 2015-2023.
Luksemburgu kryeson listën me rënien më të thellë prej 11%, i pasuar nga Greqia me 9% dhe një grup vendesh përfshirë Irlandën, Finlandën dhe Italinë me 6%.
Turqia dallohet për tendencën e kundërt, duke shënuar rritjen më të lartë prej 31%, e ndjekur nga Çekia me 16% dhe Skocia me 12%. Në Bashkimin Europian, rritja mesatare ishte 4%, ndërsa ekonomitë e mëdha si Gjermania dhe Italia regjistruan rritje modeste prej 1%.
Në një perspektivë 10-vjeçare (2013-2023), Hungaria shfaq përformancën më të mirë me 45% rritje, pasuar nga Turqia me 37%. Ndërkohë, Greqia ka vuajtur rënien më të thellë prej 12%.
Hendeku i pagave mes vendeve europiane mbetet i konsiderueshëm. Në vitin akademik 2022/23, një mësues fillestar në Luksemburg merrte 84,589 euro në vit, ndërsa në Poloni vetëm 9,897 euro. Mësuesit gjermanë me 62,322 euro në vit fitojnë pothuajse dyfish krahasuar me kolegët francezë që marrin 32,186 euro.
Kur pagat analizohen sipas Standardeve të Fuqisë Blerëse (PPS), që mundëson krahasime më të drejta, diferenca më e madhe brenda BE-së është mes Sllovakisë (11,826 PPS) dhe Luksemburgut (49,015 PPS).
OECD thekson se përtej pagave, tërheqja ndaj profesionit të mësuesit varet edhe nga mundësitë për zhvillim profesional dhe stimulimi intelektual gjatë karrierës. Megjithatë, Shqipëria mbetet vendi me pagat më të ulëta për mësuesit në të gjithë kontinentin europian.
