Seanca fillestare për vrasjen e Liridona Ademajt, e cila do të shqyrtohej ndaj Naim Murselit, Granit Plavës, Kushtrim Kokallës dhe Tom Dodajt, është shtyrë për datën 31 janar 2025. Kjo ka ndodhur pasi disa avokatë, ata të Kushtrim Kokallës dhe Tom Dodajt, nuk ishin pajisur me shkresat e lëndës.
Avokati i Kushtrim Kokallës, Ndrec Dodaj, dhe ai i Tom Dodaj, Agron Kuci, nuk kishin marrë dokumentet përkatëse. Avokati i Tom Dodajt shpjegoi se kishte pasur probleme me e-mailin, ndërsa ai i Kokallës i kishte kërkuar avokatit të Granit Plavës, Skënder Gojani, që t’i merrte shkresat e lëndës.
Kryetarja e trupit gjykues, Fatime Dermaku, e cilësoi këtë një papërgjegjësi dhe i dha vërejtje Ndrec Dodajt. Po ashtu, për prishje të qetësisë gjatë seancës, avokati Ndrec Cocaj u dënua me një gjobë prej 500 eurosh.
Prokuroria Themelore në Prishtinë ka ngritur aktakuzë ndaj të akuzuarve më 15 janar 2025. Sipas aktakuzës, Murseli, Plava dhe Kokalla ishin dakorduar për kryerjen e vrasjes së Liridona Ademajt, ku Granit Plava do ta realizonte atë, ndërsa bashkëshorti i viktimës, Naim Murseli, do t’i paguante 30 mijë euro për këtë krim.
