Skenari përsëritet. SPAK vendos të kontrollojë një tjetër pronë të Veliajt, por si gjithmonë, duke i dhënë kohë të bollshme për të fshirë gjurmët. Hetuesit u futën në apartamentin 11/4 në “Sky Tower”, pronë që dyshohet se përdoret nga Ajola Xoxa dhe kompania e saj “Harabel”. Por çfarë shpresojnë të gjejnë kur i japin kohë të mjaftueshme të dyshuarve të pastrojnë çdo provë?
Ky nuk është më hetim – është një lojë paralajmërimesh në stil Fatmir Xhafaj, ku kontrollet bëhen publike përpara se të ndodhin. Njësoj si ministri që dikur u jepte kohë të dyshuarve të përgatisnin arratinë, SPAK-u duket se po ndjek të njëjtën metodologji me kolonelin e hajdutëve.
Hetimet nxjerrin në dritë një rrjet të tërë transaksionesh të dyshimta. 180 mijë euro që kanë kaluar nga kompania e Marisa Nitos te Ajola Xoxa – bashkëshortja e kryebashkiakut që gjendet kudo ku ka para. Por ndërsa provat grumbullohen, Veliaj vazhdon të jetë i lirë të organizojë arratinë e radhës.
Ku do të shkojë kësaj here koloneli? Në Austri te vëllai që tashmë ka zgjedhur arratinë pas kontrolleve të SPAK? Në Dubai ku paratë e korrupsionit lahen më lehtë? Apo ndoshta në Iran, ku ligjet e ekstradimit janë të dobëta? Mundësitë janë të shumta kur SPAK-u të jep kohë të zgjedhësh destinacionin.
Pas fluturimit emergjent të fundvitit drejt Amerikës, pas biletës 3,395 euro të prerë në panik, pas vizitës te Alex Soros për t’u qetësuar – tani vjen radha e një tjetër ikjeje të organizuar me kujdes. Sepse kështu funksionon drejtësia “e reformuar”: Hetojmë sot, kontrollojmë nesër, të dyshuarit paralajmërohen dhe arratisen në kohë.
Ndërkohë dosja e Veliajt bëhet gjithnjë e më e rëndë: Katër akuza që kërkojnë 35 vite burg, skandali i 5D, inceneratori fantazmë, shembja e Teatrit, transaksionet e dyshimta. Por SPAK-u vazhdon të veprojë me ritmin e një institucioni që më shumë se drejtësinë, do të ruajë status quo-në.
Sa më shumë zgjaten hetimet, sa më shumë paralajmërohen kontrollet, aq më shumë kohë ka koloneli për të organizuar ikjen e radhës.
Kjo nuk është më luftë kundër korrupsionit – është një valle e organizuar ku secili di hapat përmendësh: SPAK-u paralajmëron, Veliaj përgatitet, provat zhduken dhe arratia organizohet. Ndërsa qytetarët presin drejtësi, koloneli i hajdutëve vazhdon të qeverisë mes fluturimeve, mes kontrolleve, mes arrative.
A është kjo thjesht paaftësi e SPAK-ut apo një strategji e mirëmenduar për të mbrojtur kolonelin që di shumë? Sepse kur gjenerali i hajdutëve ka kaq shumë për të humbur, edhe drejtësia “e reformuar” duhet të veprojë me kujdes të shtuar.
/gazetareforma.com
