Gjykata e Lartë e Shteteve të Bashkuara refuzoi të enjten kërkesën e Presidentit të zgjedhur Donald Trump për të ndaluar dhënien e dënimit nga një gjykatë në Nju Jork lidhur me veprat penale që lidhen me falsifikimin e të dhënave të biznesit.
Me një vendim 5-4, gjykata mohoi kërkesën e bërë nga avokatët e Trump për të shtyrë dënimin, që ishte planifikuar të jepet të premten në mëngjes në gjykatën e shtetit të Nju Jorkut në Manhattan.
Kryetari i Gjykatës së Lartë, John Roberts, dhe anëtarja konservatore Amy Coney Barrett u bashkuan me tre anëtarë liberalë të gjykatës – Sonia Sotomayor, Elena Kagan dhe Ketanji Brown Jackson – në votimin kundër kërkesës së Trump. Kjo vjen pasi një kërkesë e ngjashme ishte refuzuar më parë nga Gjykata e Lartë e shtetit të Nju Jorkut.
Gjykatësi i çështjes, Juan Merchan, tha se ai nuk ishte i prirur të dënonte Trump me burg dhe se mund të vendoste një dënim pa kushte, duke e lënë atë të lirë pa ndonjë dënim shtesë.
Ndërkohë, katër gjykatës konservatorë – Clarence Thomas, Samuel Alito, Neil Gorsuch dhe Brett Kavanaugh – votuan në favor të kërkesës së Trump.
Trump u shpall fajtor më 30 maj 2024 për 34 akuza penale për falsifikimin e të dhënave të biznesit, që lidhen me një pagesë prej 130 mijë dollarësh për të blerë heshtjen e aktores së filmave pornografikë, Stormy Daniels, para zgjedhjeve presidenciale të vitit 2016. Daniels ka pretenduar se ka pasur një marrëdhënie seksuale me Trump në vitin 2006, një pretendim që Trump e ka mohuar vazhdimisht.
Prokurorët argumentojnë se pagesa ishte pjesë e një skeme më të gjerë për të fshehur lidhje të mundshme jashtëmartesore, dhe se ish-avokati i Trump, Michael Cohen, bëri pagesën për Daniels dhe më pas u rimbursua nga Trump.
Falsifikimi i të dhënave të biznesit mund të çojë deri në katër vjet burgim. Ky është rasti i parë që një ish-president amerikan shpallet fajtor për një vepër penale.
