Në pikën e kalimit kufitar të Kakavijës vijon largimi masiv i emigrantëve që festuan ndërrimin e viteve në Shqipëri.
Brenda 24 orëve të fundit, rreth 6.500 shtetas kanë dalë nga vendi, ndërsa 3.600 të tjerë kanë hyrë.
Për të përballuar fluksin e lartë të udhëtarëve, policia shqiptare ka hapur 4 sportele në dalje dhe 2 në hyrje, ndërsa pala greke operon me 3 sportele në hyrje dhe 2 në dalje.
Koha mesatare e pritjes gjatë kësaj periudhe ka qenë rreth 40 minuta, ndërsa orët më të ngarkuara rezultojnë të jenë mëngjesi dhe mbrëmja. Autoritetet këshillojnë shfrytëzimin e orëve të mesditës për të shmangur radhët e gjata.
Që prej fillimit të vitit, fluksi në këtë pikë kufitare ka qenë i vazhdueshëm, ndërsa që nga mesi i dhjetorit e deri tani, përmes Kakavijës kanë hyrë në Shqipëri rreth 100 mijë qytetarë, një numër disi më i lartë se ai i viteve të kaluara.
Për lehtësimin e lëvizjes, policitë shqiptare dhe greke kanë zhvilluar disa takime dypalëshe, të mbikëqyrura nga ministri i Brendshëm.
Fundjava po shënon kulmin e fluksit në dalje, pasi të hënën rifillon puna në Greqi. Edhe pikat e tjera kufitare, si Qafë-Bota, Tri Urat dhe Sopiku, kanë një ritëm të lartë të lëvizjeve në dalje. Të parët që janë larguar janë punonjësit sezonalë, veçanërisht ata të sektorëve të bujqësisë së agrumeve dhe ullinjve.
Në ditët me fluks më të lartë gjatë festave, pritja në Kakavijë ka kaluar edhe 2 orë, duke krijuar radhë të gjata dhe shqetësime për udhëtarët.
