Gjykata e Tiranës ka dënuar këtë të premte sanitaren Tire Alldervishi me 4 vite burg për akuzën e “Mashtrimit”.
Megjithatë, dënimi është zbutur në një masë alternative prej 2 vitesh shërbim prove, pasi periudha e vuajtjes së dënimit ka nisur që nga arrestimi i saj më 12 janar 2021. Gjykata vendosi pezullimin e dënimit për 11 muajt e mbetur.
Skandali “Tire” u zbulua gjatë pandemisë COVID-19, kur Alldervishi prezantohej si infermiere dhe u merrte familjarëve të pacientëve shuma të mëdha parash në këmbim të kujdesit për të afërmit e tyre.
Ajo u kap në flagrancë nëpërmjet video-përgjimeve, ku një vajzë dëshmoi se Alldervishi i kishte marrë 8 milionë lekë për të ndihmuar nënën e saj, e cila më pas ndërroi jetë.
Prokuroria kishte kërkuar 7 vite burg për Alldervishin dhe 6 vite burg për disa infermiere të tjera të spitalit “Shefqet Ndroqi”, duke përfshirë Sheqerije Koçin, Sidorela Çelën, Erjola Jazxhin, Gylbra Halilajn dhe sanitaren Rukije Hoxhaj, të akuzuara për mashtrim dhe shpërdorim detyre.
Megjithatë, të gjithë këto të fundit u shpallën të pafajshme nga gjykata.
