Komisioni Qendror i Zgjedhjeve (KQZ) po pret përfundimin e procedurave ligjore për të vendosur në lidhje me çështjen e certifikimit të Listës Serbe për zgjedhjet parlamentare të 9 shkurtit.
Më 25 dhjetor, Paneli Zgjedhor për Ankesa dhe Parashtresa (PZAP) anuloi vendimin e KQZ-së për moscertifikimin e Listës Serbe dhe urdhëroi që kjo parti të certifikohet.
PZAP-i gjithashtu ka këshilluar se kundër këtij vendimi mund të bëhet ankesa në Gjykatën Supreme brenda 48 orëve.
Zëdhënësi i KQZ-së, Valmir Elezi, tha për Radion Evropa e Lirë se komisioni do të presë përfundimin e procedurave ligjore para se të vendosë për futjen e çështjes në rend dite.
Më 23 dhjetor, përfaqësuesit e Lëvizjes Vetëvendosje votuan kundër certifikimit të Listës Serbe, ndërsa përfaqësuesit e partive të tjera abstenuan. Lista Serbe e cilësoi veprimin e KQZ-së si të kundërligjshëm dhe e mirëpriti vendimin e PZAP-it, duke e konsideruar atë si një përpjekje për të eliminuar këtë parti nga procesi zgjedhor.
Në vendimin e PZAP-it, thuhet se Zyra për regjistrim, certifikim dhe kontroll financiar e partive politike kishte rekomanduar certifikimin e Listës Serbe, pasi kjo e fundit kishte dorëzuar dokumentacionin në përputhje me ligjin për zgjedhjet e përgjithshme dhe rregullat e KQZ-së. PZAP-i theksoi se Lista Serbe kishte përmbushur kriteret për certifikim dhe se KQZ-ja duhej ta certifikonte atë për pjesëmarrje në zgjedhje.
Njohësit e zhvillimeve politike kishin parashikuar se Paneli Zgjedhor do të merrte vendim në favor të Listës Serbe dhe do të detyronte KQZ-në të certifikonte këtë parti. Lista Serbe ka njoftuar se do të marrë pjesë në zgjedhjet e 9 shkurtit, pas një periudhe bojkotimi të proceseve politike në Kosovë. Në vitin 2022, anëtarët e kësaj partie dhanë dorëheqje kolektive nga institucionet e Kosovës si shenjë kundërshtimi ndaj vendimeve të autoriteteve të Kosovës për shtrirjen e autoritetit në gjithë territorin e vendit.
Ish-nënkryetari i Listës Serbe, Millan Radoiçiq, ka marrë përgjegjësinë për sulmin e 24 shtatorit të vitit të kaluar në Banjskë të Zveçanit, ku një grup serbësh të armatosur vrau një rreshter të Policisë së Kosovës.
Autoritetet e Kosovës e konsiderojnë këtë sulm si terrorist dhe e fajësojnë shtetin serb për organizimin dhe kryerjen e tij, por Beogradi hedh poshtë këto akuza.
Anëtarët e Lëvizjes Vetëvendosje në KQZ e kanë arsyetuar moscertifikimin e Listës Serbe me faktin se kjo parti nuk ka dënuar sulmin në Banjskë dhe nuk është distancuar nga “aktet terroriste” që kanë ndodhur në Kosovë.
Kosova kërkon ekstradimin e Radoiçiqit, i cili besohet të jetë i lirë në Serbi.
