“Klorpirifos dhe fosmet” – dy emra që Europa i ndaloi se vrasin, ne i hamë se institucionet heshtin. Në tryezat tona sot shërbehet helmi që BE refuzon kategorikisht për qytetarët e vet.
Shifra tronditëse: 924 kamionë eksporti, të gjithë me helm. 1000 hektarë mandarina, vetëm 28 mostra kontrolli. Çdo ngarkesë e kontrolluar nga BE, e infektuar me pesticide. Zero reagim nga institucionet tona
Por pas shifrave fshihet një tragjedi më e thellë: Nënat shtatzëna hanë sot helm, nesër lindin fëmijë me anomali. Fëmijët konsumojnë pesticide që dëmtojnë trurin në zhvillim. Efektet mutagjene do ndjekin brezat për dekada
Sistemi RASFF ngre alarmin, Europa mbron qytetarët e saj. Ne? Kemi një Ministri që numëron inspektime imagjinare dhe një AKU që ka kthyer heshtjen në art. Në një det me 1000 hektarë mandarina, gjejnë kohë të “kontrollojnë” vetëm 28 mostra.
Pasojat fillojnë me shenja të lehta: Djegie të lëkurës, marrje mendsh, probleme me frymëmarrjen… Por përfundojnë me dëmtime të përhershme gjenetike, anomali në zhvillimin e fetusit, çrregullime neurologjike të pakthyeshme
Më tmerrues është fakti se kjo nuk është një tragjedi e rastësishme – është një sistem i tërë që ka vendosur të heshtë ndërsa një popull helmohet ngadalë. Ku më shumë na mbron sistemi europian i kontrollit sesa rojtarët tanë të shëndetit publik.
Në këtë vend të çuditshëm ku letrat e vetëdeklarimit vlejnë më shumë se analizat laboratorike, një pyetje na ndjek: Sa breza duhet të helmohen para se dikush të flasë? Sa fëmijë duhet të lindin me anomali para se institucionet të zgjohen nga heshtja vrastare?
Mandarinat e helmuara janë simptoma e një sëmundjeje më të thellë – një sistem që ka vendosur të sakrifikojë shëndetin e një populli të tërë në altarin e heshtjes institucionale.
/gazetareforma.com
