Policia e Fierit ka finalizuar operacionin e koduar “Drugs”, duke arrestuar një 42-vjeçare dhe duke shpallur në kërkim pronarin e një lokali ku shitej dhe konsumohej drogë.
Në pranga ka rënë shtetasja M. K., banuese në Fier, e cila punonte si kamariere dhe banakiere në një lokal në lagjen “1 Maji”.
Gjatë kontrollit në ambientet e lokalit, policia gjeti dhe sekuestroi një sasi lënde narkotike të dyshuar cannabis sativa.
Pronari i lokalit, shtetasi S. O., 43 vjeç, është shpallur në kërkim për veprën penale “Përshtatja e lokalit për përdorim droge”.
Ndërkohë, kushëriri i tij, M. O., 30 vjeç, është proceduar në gjendje të lirë për veprën penale “Pastrimi i produkteve të veprës penale ose veprimtarisë kriminale”, pasi në automjetin e tij u gjetën dhe sekuestruan 13,000 euro, të dyshuara si të përfituara nga veprimtaria kriminale.
Në cilësinë e provave materiale u sekuestruan lënda narkotike, shuma e parave, një automjet, një grirëse dhe tre celularë.
Policia po vijon hetimet për kapjen e pronarit të lokalit dhe dokumentimin e plotë të aktivitetit kriminal.
Materialet procedurale i janë dërguar Prokurorisë për veprime të mëtejshme.
