Përtej tragjedisë së rëndë të humbjes së një jete të re, rasti i Martinit po kthehet në një përplasje politike mes palëve. Ndërsa opozita përpiqet ta paraqesë si dështim total të institucioneve shtetërore, mazhoranca e quan dezinformim me synim politik. Por familjet e përfshira në këtë ngjarje të rëndë kanë kërkuar që tragjedia të mos politizohet, duke e konsideruar një hall personal familjar që s’ka lidhje me politikën.
Avokati i familjes së Martin Canit, 14-vjeçarit që u vra me thikë nga bashkëmoshatari i tij, ka reaguar ashpër ndaj deklaratave të deputetit socialist, Erion Braçe, për pretendimin e këtij të fundit mbi nisjen e hetimeve lidhur me raportimet e mediave për vrasjen e Martin Canit pranë shkollës “Fan Noli” në Tiranë.
Pas mbledhjes së komisionit për dezinformimin, Braçe iu referua raportimit për vrasjen e Martin Canit duke theksuar se i është kërkuar prokurorisë të hetojë atë që ai e quan “një rast model dezinformimi” me synim politik, duke përfshirë edhe atakun ndaj institucioneve si SPAK dhe BKH.
Në studion e emisionit “Ora e Betit”, avokati Redi Ramaj kritikoi ashpër qëndrimin e institucioneve shtetërore. Sipas tij, ato kanë dështuar tërësisht në menaxhimin e rastit dhe informimin e familjes së viktimës.
“Të çosh fëmijën në një institucion publik shtetëror, dhe të të vritet në derën e tij, është krimi më i madh që mund t’i ndodhë një shoqërie,” u shpreh Ramaj, duke shtuar se familja ka pasur vetëm median si burim informacioni.
Avokati nënvizoi mospërputhjet në raportimet e Policisë së Shtetit, ku numri i të përfshirëve në konflikt ka ndryshuar vazhdimisht, nga 2-3 fillimisht në 11 fëmijë aktualisht. Ai shprehu dyshime për përfshirjen e personave madhorë dhe ngjarje paraprake që nuk janë hetuar.
Ramaj kritikoi gjithashtu mungesën e reagimit nga institucionet arsimore, duke përmendur se drejtoresha e shkollës “Fan Noli” nuk ka shprehur as ngushëllimet për familjen e Martinit. Sipas tij, raportimet e nxituara të mediave janë pasojë e drejtpërdrejtë e mungesës së transparencës nga institucionet shtetërore.
“Sot që flasim, unë kam depozituar në të gjithë institucionet kërkesa për informacion dhe ende nuk kam asnjë material të dosjes,” përfundoi avokati Ramaj.
