Protesta e studentëve vazhdon për të 13-tën ditë radhazi dhe ata nuk kanë ndërmend të tërhiqen derisa kërkesat e tyre të plotësohet pa negociata.
Demonstrata këtë të hënë, ashtu si prej rreth 2 javësh, nisi rreth orës 09:00 duke u mbledhur në fakultete, ku në shenjë proteste në disa prej tyre mbyllën me zinxhir portën apo vendosën shirita.
Më pas protesta u zhvendos para Kryeministrisë, ku me pankarta dhe thirrje studentët kërkuan që t’u plotësohen 8 kërkesat pa dialog.
Rreth orës 14:30, ashtu siç e kishin paralajmëruar më herët, protestuesit të stacionuar tek Kryeministria, u ndanë në tre grupe, ndërsa në shenjë përshkallëzim do të bllokojnë tre pika kyçe në Tiranë.
Disa prej protestuesve u nisën drejt Bankës së Shqipërisë, disa të tjerë tek Zogu i Zi dhe disa të tjerë tek kryqëzimi afër Kryeministrisë. Ende nuk dihet afati se sa do të qëndrojnë të bllokuara këto rrugë.
Pavarësisht thirrjeve, ata kanë nënvizuar faktin se kauza e tyre nuk është politike. Nga ana tjetër kryeministri Edi Rama këmbëngul se nuk do të marrë asnjë vendim pa dialog.
