Gazetari Enton Abilekaj ka akuzuar qeverinë për përdorimin e bonuseve për pensionistët si një mjet për përfitime elektorale, duke e krahasuar këtë veprim me shpërndarjen e parave të rindërtimit pak para zgjedhjeve të përgjithshme të vitit 2021.
Në një intervistë për Syri TV, Abilekaj deklaroi se fondet e rindërtimit për tërmetin e vitit 2019 u mbajtën qëllimisht peng për t’u shpërndarë gjatë fushatës zgjedhore, duke e cilësuar këtë veprim si një shkelje të hapur të ligjit dhe të moralit.
Sipas tij, modeli ekonomik i ndjekur nga qeveria ka dështuar, duke u bazuar në pastrim parash dhe shpërndarje të padrejtë të pasurisë. “Buxheti i shtetit, që qeveria e prezanton si të madh, në realitet është shumë i ulët, pasi rritja e tij vjen nga rënia e euros dhe jo nga zhvillimi ekonomik,” tha Abilekaj.
Ai theksoi se pensionistët po përballen me kushte të vështira ekonomike, ndërsa kabineti qeveritar shpenzon për luks. Ndërkohë, sektorë si turizmi dhe ndërtimi mbajnë barrën kryesore të ekonomisë, duke shmangur prodhimin vendas dhe zhvillimin e qëndrueshëm.
“Kur je i varfër, paguan mbi 40% taksa, ndërsa të pasurit paguajnë vetëm 5%. Ky model është i padrejtë dhe ka krijuar një emergjencë ekonomike për pensionistët, të cilët mezi sigurojnë bukën e gojës,” përfundoi gazetari.
