Në një hetim të mbështetur nga Europol, autoritetet ligj-zbatuese nga Belgjika, Kolumbia dhe Spanja kanë shkatërruar një kartel droge që organizonte trafik në shkallë të gjerë kokaine nga Kolumbia në vendet e Bashkimit Evropian.
Autoritetet kombëtare kanë realizuar deri tani 32 arrestime, përfshirë kreun e një rrjeti kriminal. Gjatë kësaj jave janë ndaluar gjashtë persona, të cilët luanin role kyçe për funksionimin e kartelit. Po ashtu, Policia ka sekuestruar 5.8 ton kokainë në Kolumbi, Spanjë dhe Belgjikë, sipas njoftimit të Europolit.
Bashkëpunimi ndërkombëtar i krijuar midis Europolit dhe vendeve strategjike të Amerikës së Jugut, si Kolumbia, është dëshmuar të jetë vendimtar në avancimin e hetimeve në shkallë të gjerë dhe në shkatërrimin e karteleve kriminale që kontrabandojnë tonelata kokainë në Evropë.
Hetimi, i realizuar në kuadër të Grupit të Punës Operacional të Europolit, ka nisur në prill të vitit 2023 dhe ka synuar ndalimin e kontrabandës së kokainës në shkallë të gjerë. Gjatë një aksioni të fundit, Policia kolumbiane ka arrestuar individë që mbanin pozita të ndryshme kyçe brenda organizatës.
Të dyshuarit përfshijnë udhëheqësin e kartelit, investitorë, koordinatorë të operacioneve të trafikut të qenieve njerëzore, zyrtarë të korruptuar dhe punëtorë përgjatë zinxhirit logjistik. Hetimi ka zbuluar se karteli ishte në gjendje të eksportonte sasi të mëdha kokaine përmes anijeve tregtare. Kokaina fshihej brenda kontejnerëve dhe dërgohej në porte evropiane nga disa porte të Kolumbisë, si Cartagena dhe Barranquilla.
Anëtarët e kartelit bashkëpunonin me autoritete të korruptuara për të shmangur kontrollet policore dhe doganore gjatë fazave të ndryshme të tregtisë së kokainës.
Identifikimi dhe përgjimi i zyrtarëve të korruptuar ishte kyç për thyerjen e të gjithë zinxhirit komandues dhe logjistik të këtij karteli.
Trafiku i drogës në shkallë të gjerë kërkon një organizim logjistik kompleks, kartelet e drogës priren të korruptojnë autoritetet për të lehtësuar trafikun e drogës në faza të ndryshme, nga prodhimi në eksport.
