Ministri i Punëve të Brendshme të Kosovës, Xhelal Sveçla, njoftoi se gjatë një bastisjeje në veri të vendit këtë të martë, janë sekuestruar armë, municione dhe uniforma ushtarake të disa shteteve.
Në një postim në “Facebook”, ai publikoi pamje të arsenalit të gjetur, duke përfshirë uniforma të ushtrive të Serbisë, Rusisë, SHBA-ve dhe Britanisë së Madhe.
Sveçla deklaroi se këto gjetje zbulojnë plane për krime dhe tentativa për destabilizim, me qëllim fajësimin e shteteve të tjera.
Ai paralajmëroi ndëshkime të ashpra për këdo që tenton të cenojë rendin kushtetues dhe sigurinë e Kosovës, duke theksuar se forca e ligjit do të triumfojë.
Kontrollet në veri, të banuar kryesisht nga serbë, janë intensifikuar pas sulmit terrorist në kanalin Ibër-Lepenc. Në ditët e fundit, janë zbuluar disa arsenale armësh në këtë zonë.
