Në Shqipëri, përgatitjet për Asamblenë Zgjedhore të Federatës Shqiptare të Atletikës kanë nisur prej më shumë se dy muajsh, por situata është bërë më e ndërlikuar pas daljes së kandidaturës të Izmir Smaljajt për postin e presidentit.
Ai, pas një periudhe dëmtimesh dhe rezultateve të dobëta, vendosi të sfidojë ish-trajnerin dhe mikun e tij, Taulant Stërmasi, presidentin aktual i Federatës.
Në një kohë që publikisht ata dukeshin ende miq, prapaskenat dhe lufta për pushtet ishin bërë gjithnjë e më të ashpra dhe të paqarta.
Luzia Gega, sportistja e Taulantit dhe kampione e Europës, denoncoi në një intervistë për “Top Channel” manipulimet dhe padrejtësitë në procesin zgjedhor, duke theksuar përjashtimin e saj dhe të Stërmasit nga gara.
Përjashtimi u bë për shkak të një lëvizjeje të dyshimtë, ku, sipas Gegës, organizatorët e zgjedhjeve kishin krijuar në mënyrë artificiale 7 shoqata sportive të atletikës, pa asnjë lidhje me sportin, të cilat do të merrnin pjesë në zgjedhje, duke përjashtuar klubet e vjetra anëtare.
Kjo manovër i përjashtoi automatikisht Gegën dhe Stërmasin nga garën për president.
Situata ka nxitur një reagim nga Ministria e Sporteve. Burime konfidenciale raportuan për “Top Channel” se Ministrja Ogerta Manastirliu organizoi një takim me protagonistët e përfshirë, ku u kërkua shtyrja e zgjedhjeve, që ishin planifikuar për 4 dhjetor, dhe rikthimi i procesit në kushte normale.
Sipas këtyre burimeve, kjo ishte një “tërheqje veshi” për të gjithë palët, në përpjekje për të gjetur një zgjidhje të drejtë dhe pa shumë tensione.
