“Mirë se erdhe në Rebibbia” është një nga librat më të shitur në Panairin e fundit, shkruar nga artistja Elsa Lila.
Gjatë një interviste në “Opinion”, ajo ndau përvojën e saj prej 55 ditësh në qeli, të cilat i cilësoi si një vuajtje e padrejtë.
Lila falënderoi lexuesit për interesimin e tyre ndaj historisë së saj dhe shpjegoi arsyet që çuan në burgosjen e saj në një nga institucionet më të frikshme të drejtësisë italiane.
U burgosa sepse u akuzova si pjesëmarrëse në një organizatë kriminale për shpërndarje të lëndëve narkotike. Më akuzonin se unë isha një nga krerët e këtij absurditeti.
I vetmi link ishte njohja e miqësia ime me dy prej të akuzuarve, të cilët janë shqiptarë. I njihja pa e ditur se çfarë bëjnë ata. Kur isha në 41 biss, ato dy javë telefoni im u kontrollua në të gjitha celulat.”
Për herë të parë, këngatarja e njohur ndau dyshimet e saj sa i takon burgosjes pa fakte.
Duke qenë se është absurde që pa prova një person publik, një artiste e nderuar e respektuar të përdorej si lajmmotiv, të përdorej si heroina e kësaj organizate, mbrapa kishte diçka madhore e tendencioze, ndoshta edhe nga këtu…Për të bërë një efekt bilardo, një efekt domino nëpërmjet Elsa Lilës. Për të përdorur Elsa Lilën! Do të thotë që kanë përdorur imazhin tim!”
Ajo theksoi se do të ndjekë rrugën ligjore për të kërkuar rimbursim, pasi qëndroi thuajse dy muaj në izolim, megjithëse ishte e pafajshme.
“Pas 55 ditësh, do ta lexoni në libër, isha e vetmja që kërkova një pyetësor. Prokurori që ndiqte çështjen u bind totalisht nga përgjigjet e mia, nga mungesa e fakteve dhe në celular s’kishte asnjë komunikim me bandat.
Personat në fjalë ishin miq të miqve, që u transferuan në Romë para disa vitesh. Që takoheshim herë pas here për ndonjë kafe, ndonjë birrë. Të gjithë janë brenda! Arrita dhe pata fatin të takoja dhe njerëz shumë dashamirës aty brenda, që më ndihmuan që ato ditë të ishin më të jetueshme”, tregoi Lila.
