Pas një seance maratonë në sallën e Kuvendit, rreth orës 23:00 të mbrëmjes së djeshme, me shumicë votash deputetët miratuan ndryshimet në Kodin Zgjedhor, ku më kryesoret janë hapja e listave me 2/3 e tyre, si dhe vota e diasporës. Pas paktit të arritur në grupin e dialogut mes Partisë Socialiste dhe Partisë Demokratike të udhëheque nga Berisha, ndryshimet u miratuan në Kuvend me votat pro të 106 deputetëve, dhe 2 kundër.
Fillimisht gjatë votimit në parim, ndryshimet në Kod u miratuan me 105 vota pro dhe 8 vota kundër nga opozita konkretisht Enkelejd Alibeaj, Lulzim Basha, Dashnor Sula, Seladin Jakupllari, Merita Bakiu, dhe aleatëve Dashamir Shehi, Agron Duka e Fatmir Mediut.
Me votat kundër të mazhorancës dhe mospjesëmarrjen në votim të grupit të PD-së u rrëzuan edhe propozimet e Fatmir Mediut dhe Lulzim Bashës. Ndërsa u miratuan në bllok përfshirja me detyrim e kuotës gjinore si në listat e hapura ashtu edhe ato të fiksuara.
Drafti në terësi mori 106 vota pro dhe dy kundër të deputetëve Enkelejd Alibeaj dhe Dashnor Sula. Në sallë vijuan të qëndrojnë deputetët e PL që votuan pro, duke konfirmuar kështu aleancën me Partinë Demokratike që drejtohet nga Berisha.
Seanca u parapri nga debate të shumta, me Lulzim Bashën dhe deputetë të tjerë që hodhën akuza për pazare, ndërsa në sallë mungonin dy personat që kanë ‘bekuar’ se largu marrëveshjen, Edi Rama dhe Sali Berisha. Kryeministri ishte dje në Francë, në ceremoninë hapëse të lojërave olimpike, ndërsa Berisha e ka të pamundur të jetë fizikisht në Parlament për shkak të masës së arrestit të shtëpisë.
