Trajneri i Athletic Bilbaos, Ernesto Valverde, ka hedhur poshtë spekulimet për një lëvizje të mundshme të yllit të skuadrës, Nico Williams, te Barcelona. Valverde ka theksuar se Williams është i lumtur në Bilbao dhe se prioriteti i tij është të përballet me sfidat e këtij sezoni me ekipin aktual.
“Nuk kam asnjë dyshim për Nicon. E shoh mirë dhe të lumtur. Këtë vit kemi shumë sfida përpara nesh dhe Nico me siguri do të dojë t’i përballojë ato,” tha Valverde. “Nuk është lojtari i pari dhe as i fundit që i duhet të jetojë me thashethemet sepse merkato do të jetë e hapur deri në fund të gushtit.”
Valverde vlerësoi aftësitë e Williams dhe pranoi se mund të ketë klube të interesuara për të, por theksoi se lojtari është i kënaqur me skuadrën aktuale. “Ai është një lojtar i madh dhe mund të ketë klube që mund të jenë të interesuara, por ai është i lumtur me ne dhe ne jemi të kënaqur me të,” shtoi trajneri i Bilbaos.
Përfundimisht, Valverde konfirmoi se llogarit në Williams për këtë sezon dhe pret që ai të kthehet nga pushimet për t’u bashkuar me skuadrën. “Unë e llogaris Nicon pjesë të skuadrës në momentin që ai do të kthehet nga pushimet,” përfundoi Valverde.
Këto deklarata të Valverdes vijnë në një kohë kur merkato është e hapur dhe spekulimet rreth të ardhmes së lojtarëve janë në kulmin e tyre. Megjithatë, duket se për momentin, Nico Williams do të vazhdojë të jetë një pjesë kyçe e Athletic Bilbaos.
