Autoriteti Kombëtar i Ushqimit (AKU) ka reaguar me një njoftim zyrtar pas raportimeve të Komisionit të Lartë të Kontrollit të Shtetit (KLSH) që kanë ngritur shqetësime serioze mbi praninë e akullores me përbërje kancerogjene në tregun shqiptar. Sipas raportit të KLSH, gjatë periudhës mars-maj të vitit 2021, në tregun shqiptar janë shitur 13.2 ton akullore që përmbajnë oksid etileni, një substancë që shkakton kancer dhe leucemi. Produktet janë shpërndarë kryesisht në qytetet e Tiranës, Durrësit, Fierit, Elbasanit, Vlorës, Beratit, Lushnjes, Korçës, Shkodrës, Sarandës, Krujës, Burrelit, Peshkopisë, Tropojës dhe Lezhës.
Në njoftimin e saj, AKU ka bërë të ditur se më datë 30 korrik 2021, në orën 11:49 PM, përmes sistemit RASFF është informuar se Shqipëria është në listën e 47 vendeve të furnizuara me akullore nga një kompani franceze, e cila përmbante substancën e paautorizuar “oksid etileni” në stabilizuesin “lygomme” të përdorur për prodhimin e akullores. AKU ka kryer verifikimet e nevojshme të sasisë së importuar dhe ka nisur inspektimet në operatorët e biznesit ushqimor për të ndjekur gjurmueshmërinë e produktit dhe për të tërhequr nga tregu dhe asgjësuar produktin e kontaminuar.
Importet për këtë produkt, sipas loteve të përcaktuara nga sistemi RASFF, janë kryer gjatë periudhës nga 1 mars deri më 22 maj 2021. Brenda periudhës 7-ditore nga marrja e njoftimit, AKU ka kryer inspektimet në subjektet përkatëse dhe ka bllokuar dhe asgjësuar të gjithë sasinë e këtij produkti.
AKU thekson se ka ndjekur të gjitha procedurat për garantimin e sigurisë ushqimore dhe mbrojtjen e shëndetit të konsumatorëve. Megjithatë, ky incident ka ngritur shqetësime të mëdha mbi efektivitetin e kontrollit të importit të produkteve ushqimore dhe sigurinë e tyre në tregun shqiptar.
Por ky nuk është i vetmi rast skandali ku del hapur emri i AKU. Ushqime bazë, si mishi apo bulmeti që prej kohësh nuk duhet të tregtoheshin në vendin tonë kanë qarkulluar lirshëm nëpër biznese. AKU pa më të voglin përgjegjësi po luan hapur me jetën e qytetarëve.
