Një shpërthim i fuqishëm ndodhi mbrëmjen e djeshme rreth 100 metra larg Portit Detar të Sarandës, që dyshohet të jetë shkaktuar nga një eksploziv. Polumbarët kanë gjetur sot në thellësinë e detit copa metalike që dyshohet se i përkasin mjetit lundrues ku ndodhej viktima, por ende nuk është arritur të përcaktohet saktësisht për çfarë mjeti bëhet fjalë.
Ekspertët kanë dyshime të forta se shpërthimi ka ndodhur mbi sipërfaqen e ujit dhe ka qenë i shkaktuar nga një eksploziv. Viktima duket se ndodhej në një mjet tepër të vogël dhe ndoshta artizanal lundrues pranë Portit Detar. Shpërthimi ndodhi në orën 22:00, në kohën kur vëmendja ishte te ndeshja Shqipëri-Spanjë.
Sipas burimeve konfidenciale, viktima është parë nga dy të huaj që po lundronin me një gomone të vogël drejt jahtit të tyre të ankoruar në radë. Ata e kanë pyetur nëse kishte problem me diçka, por ai u është përgjigjur “Jo”. Vetëm pak sekonda më pas është dëgjuar shpërthimi i fuqishëm, i cili është shoqëruar me zjarr, tym dhe zhurmë që ka tronditur gjithë qytetin.
Edhe pse viktima ende nuk është identifikuar zyrtarisht, burime të besueshme konfirmojnë se ai është shtetas shqiptar dhe jo i huaj, siç dyshohej fillimisht. Hetimet po vazhdojnë për të zbuluar më shumë detaje mbi ngjarjen dhe për të përcaktuar motivet dhe autorët e mundshëm të këtij akti të rëndë. Autoritetet janë në gatishmëri dhe po bashkëpunojnë me institucionet përkatëse për të zbardhur plotësisht këtë incident.
