Kreu i Partisë Demokratike (PD), Sali Berisha, bëri thirrje për një bashkim të gjerë opozitar, duke theksuar rëndësinë e mirëpritjes së të gjithë demokratëve që dëshirojnë të bashkohen me PD-në. “Armiku ynë i përbashkët është Edi Rama. PD ka nevojë jo vetëm të bashkohet me të gjithë anëtarët dhe mbështetësit e saj, por ka nevojë të bashkohet më shumë se kurrë me të gjithë spektrin opozitar,” tha Berisha gjatë një fjalimi.
Berisha theksoi se një front i gjerë dhe i bashkuar opozitar është vendimtar për të përballuar regjimin e Edi Ramës, i cili sipas tij dhunon çdo ligj dhe Kushtetutë të vendit. “Edi Rama është në pushtet, dhunon çdo ligj e Kushtetutë të këtij vendi, edhe për faktin se ne e lejojmë atë,” tha Berisha, duke kritikuar gjithashtu dobësinë e opozitës aktuale.
Ai argumentoi se regjimi i Edi Ramës duhet luftuar nga të gjithë shqiptarët, duke shtuar se skandalet e qeverisë aktuale nuk kanë të ndalur. Berisha bëri thirrje për krijimin e një qeverie teknike për të shpëtuar vendin nga ky regjim. “Detyra jonë është një dhe vetëm një, krijimi i Qeverisë teknike dhe shpëtimi i vendit nga ky regjim,” deklaroi ai, duke shtuar se Edi Rama ka humbur legjitimitetin pas zgjedhjeve të 14 majit dhe se opozita duhet të forcohet për të sfiduar pushtetin e tij.
