Policia e Shtetit ka njoftuar arrestimin e Armando Masha, një 49-vjeçar me rrezikshmëri të lartë shoqërore, i cili ishte shpallur në kërkim ndërkombëtar për një vrasje të kryer në Spanjë. Arrestimi i tij u realizua nga Drejtoria e Forcës së Posaçme Operacionale në Departamentin e Policisë Kriminale, gjatë një operacioni të koduar “Operacionalja 11”.
Armando Masha, i lindur në Durrës, u kap në lagjen nr. 13 të qytetit pas një hetimi intensiv dhe përdorimit të informacioneve të siguruara nga inteligjenca policore. Ai ishte në kërkim ndërkombëtar që nga viti 2022, kur Gjykata e Orgivas në Spanjë i kishte caktuar masën e sigurisë “Arrest në burg” për akuzën e vrasjes, të kryer në kuadër të një grupi kriminal.
Policia e Shtetit njoftoi se Interpol Tirana është në kontakt të vazhdueshëm me homologët spanjollë për të finalizuar procedurat e ekstradimit të Masha në Spanjë, ku ai do të përballet me drejtësinë për krimet e kryera.
Arrestimi i Armando Masha është pjesë e megaoperacionit “Sundimi i ligjit”, që synon kapjen dhe sjelljen para drejtësisë të individëve me rrezikshmëri të lartë shoqërore dhe të përfshirë në aktivitete kriminale.
