Pas ndeshjes mes Shqipërisë dhe Kroacisë që përfundoi në barazim 2-2, Federata Serbe e Futbollit ka kërkuar dënime të ashpra për të dyja kombëtaret për shkak të sjelljes së tifozëve. Sekretari i Përgjithshëm i Federatës Serbe, Jovan Surbatoviç, ka deklaruar se tifozët shqiptarë dhe kroatë kanë kënduar në kor kundër Serbisë, duke kërkuar që UEFA të marrë masa të menjëhershme.
“Kjo është skandaloze. Federata do t’i kërkojë UEFA-s që të marrë sanksione. Duhen dënimet më të rënda në mënyrë që të mos përsëritet më. Do kërkojmë që UEFA të ndëshkojë rëndë Shqipërinë dhe Kroacinë. Ne nuk do të marrim pjesë në kompeticionin europian nëse nuk dënohen keqbërësit. Presim dënime rigoroze,” u shpreh Surbatoviç.
Federata Serbe kërcënon se nëse UEFA nuk vepron, Serbia do të tërhiqet nga Euro 2024. Ky kërcënim ndaj UEFA-s mund të sjellë pasoja për Federatën Serbe, duke përfshirë edhe gjoba të mundshme.
Ndërkohë, disa orë pas kërkesës për sanksione, tifozët serbë u mblodhën në Marienplatz të Mynihut, pak para ndeshjes Slloveni-Serbi, ku provokuan me thirrjet “Kosova është zemra e Serbisë”, në kundërpërgjigje ndaj provokimeve nga tifozët kroatë dhe shqiptarë.
Kujtojmë që tifozët serbë kanë qenë burim i gjobave për Federatën Serbe pas sjelljeve të tyre gjatë ndeshjes së parë kundër Anglisë, ku u përfshinë në hedhje sendesh dhe mesazhe provokuese politike. Pavarësia e Kosovës, shpallur në vitin 2008 dhe e njohur nga FIFA dhe UEFA, mbetet një çështje e kontestuar nga Serbia.
