Komisioni Evropian ka njoftuar se Ukraina dhe Moldavia kanë përmbushur kriteret për të nisur negociatat për anëtarësim në BE. Sipas zëdhënëses Ana Pisonero, të dy vendet kanë bërë reforma të mëdha kundër korrupsionit.
Gjithsesi, vendimi mund të përballet me pengesa, siç ndodhi me Shqipërinë dhe Maqedoninë e Veriut, për shkak të vetos nga shtetet anëtare, në këtë rast nga Hungaria. Kryeministri hungarez Viktor Orbán ka ngritur shqetësime për mungesën e masave nga Ukraina për mbrojtjen e të drejtave të pakicës hungareze.
Problemet dypalëshe janë të ngjashme me ato të Greqisë dhe Bullgarisë për minoritetet në Shqipëri dhe Maqedoninë e Veriut. Kancelari gjerman Olaf Scholz arriti të shmangë një votim unanim për fondet e Ukrainës duke kërkuar që kryeministri hungarez të largohej nga salla gjatë votimit.
Qeveria ukrainase, e drejtuar nga Presidenti Zelensky, ka bërë prioritet forcimin e të drejtave të pakicave, duke përfshirë ndryshimet në ligjet për arsimin në gjuhën hungareze. Dymbëdhjetë shtete anëtare të BE-së kanë kërkuar që negociatat të fillojnë para fundit të qershorit, kur Hungaria do të marrë presidencën e Këshillit të BE-së.
Mbledhja e Këshillit të Çështjeve të Përgjithshme është planifikuar për 25 qershor, ku do të vendoset për miratimin e kuadrit negociues për Ukrainën dhe Moldavinë.
