Vetëm 2 muaj në krye të Bashkisë Himarë, Blerina Bala ka hequr dorë nga detyra si kryetare e komanduar e kësaj Bashkie. Në një letër të gjatë drejtuar Këshillit Bashkiak Bala pretendon se shkak për dorëheqjen janë çështjet personale, duke u treguar diskrete në detaje.
Ky vendim nga ana e saj vetëm sa ka shkaktuar “kolaps” në Bashkinë e Himarës e cila mbetet sërish pa drejtues. Edhe pse u duartrokit nga të gjithë, duket se presioni i të qenit nën hijen e oligarkëve të qeverisë ka qenë i papërballueshëm për Blerina Balajn e cila mori vendimin më të drejtë për t’u larguar.
E vërteta e dorëheqjes së saj është një dokument, në të cilin bëhet me dije se dy ditë më parë ajo ka dhënë një urdhër për pezullimin e punimeve të subjekteve që janë pajisur me leje ndërtimi nga Bashkia Himarë në zonën turistike të kësaj bashkie për periudhën 03.06.2024 deri në 30.09.2024.
Në dokument thuhet gjithashtu se ky urdhër bëhet me qëllim sigurimin e një sezoni të qëndrueshëm, krijimin e një mjedisi miqësor për pushuesit vendas dhe të huaj, duke eliminuar zhurmat dhe ndotjet që vijnë si rezultat i ndërtimeve.
Diktatura oligarkike vazhdon. Mesa duket propozimi i Balajt për pezullimin e punimeve nuk i ka pëlqyer “x-ave” sekretë të Qeverisë dhe ka detyruar kryebashkiaken Bala të largohet duke e shpallur vendimin si dorëheqje.
Kujtojmë se më 29 Mars të 2024-ës, Këshilli Bashkiak i Himarës votoi atë mes tensionesh si kryetaren e re të komanduar. Me 15 vota pro dhe 4 kundër, Këshilli vendosi që Blerina Bala të ushtrojë detyrat e kryebashkiakes deri në mbajtjen e zgjedhjeve të reja.
Komandimi i Blerina Balës në krye të Bashkisë së Himarës erdhi pas dorëheqjes së Jorgo Goros, i cili u arrestua nga Prokuroria e Posaçme me akuzën e shpërdorimit të detyrës për tjetërsimin e 2 pronave. Ndërkohë Fredi Beleri, i cili në 14 Maj u zgjodh kryetar i Bashkisë vuan në burg dënimin me 2 vite heqje lirie për veprën penale të blerjes së votave.
Himara mbetet sërish pa drejtues, ndërsa sipas ligjit për funksionimin e pushtetit vendor, do të jetë Këshilli Bashkiak i Himarës që do të mblidhet për të votuar dhe komanduar një tjetër kryetar deri sa të mbahen zgjedhjet. 2 emrat e diskutuar për të marrë drejtimin janë Pervin Gjikuria dhe Arqile Bollano.
View this post on Instagram
