Takimi i Edi Ramës me Luftar Hysën, vërteton edhe njëherë faktin se kreu i qeverisë i ka dhënë vetes fuqinë të ftoj këdo në zyrën e tij. Madje edhe persona krimi apo mashtrues, duke bashkëpunuar me ta e më pas t’u pastrojë imazhin sa herë që del para gazetarëve dhe pyetet për ta.
Rama tha se e ka pritur njëherë në zyrën tij, pa e ditur se kush ishte. Kreu i qeverisë nuk mban përgjegjësi kë merr te zyra, dhe rasti më flagrant është ky. Mesa duket kushdo që do të ndërtojë mbi 3000 hotele ose kazino në jug a veri të vendit, mund t’i bëjë fare thjeshtë vetëm me një takim te tavolina e tij. Në investigimin e radhës nga “Report”, Rai nënvizohet e bardha mbi të zezë se Hysa është një emër që është konsideruar nga Kanadaja si një nga narko-trafikantët e Amerikës Latine, i cili pastron para në emër të kartelit “Sinaloa”.
Hysa lan mëkatet te Blendi Fevziu
Hysa u hoq si artist për t’u futur në Kryeministri pa u rënë në sy gazetarëve edhe pse pamjet po bëjnë xhiron e rrjetit. Për të pastruar imazhin Hysa një ditë më pas i ftuar në emisionin Opinion të Blendi Fevziut deklaroi se qëllimi i vizitës së tij në kryeministri ishte artistik. Megjithatë fati i librit të mikut skocez nuk u mor vesh asnjëherë, nuk pamë asnjë publikim të tij me “instruksionet” e Ramës për Shqipërinë.
“Njolla” si anëtar i kartelit të Sinaloas po e përndiqte kudo Hysën dhe libri nuk piu ujë si histori. Ndaj strategjia e vetme ishte të mohonte kategorikisht përmes mediave lidhjen e tij famëkeqe që në fakt në mediat meksikane tashmë kishte marrë “dhenë”.
Edhe kryeministri u angazhua fort publikisht. I pyetur nga gazetarët në Shqipëri për takimin e tij me Luftar Hysën, Edi Rama i quajti akuzat shpifje dhe mediat e vatanit llum.
VIDEO 0:32- 0:45/ 1:08-1:36 (Deklarata e Ramës)
Deklarata e Ramës për Hysën në RAI 3
Ndërsa në intervistën e tij mbrëmjen e djeshme ai bëri një sy qorr e një vesh shurdh duke pretenduar fillimisht se nuk e njihte se kush ishte Luftar Hysa dhe aq më pak lidhjet e tij me kartelin e Sinaloas, për të cilat “doli zot” një vit më parë të thoshte se janë akuza të rreme.
Megjithatë ky nuk ishte përgënjeshtrimi i vetëm i kryeministrit në lidhje me atë takim. Para gazetarëve të Rai-t Rama tha se arsyeja e vizitës së Luftar Hysës në zyrën e tij ishte licenca e kazinosë.
Rama hiqet sikur nuk di gjë
Pra Rama i cili pretendon se nuk i njeh këta persona, i fton në zyrë pa ditur asgjë për ta. Si është e mundur? Kreu i qeverisë nga tavolina e të cilit kalon çdo informatë, nuk di asgjë për të ftuarit e tij special? Ai mund ta mohojë sa herë të dojë të vërtetën, por tashmë veprimet dhe jo veprimet e SPAK kanë zbuluar eksponentë të qeverisë së tij që janë palë me krimin dhe pas hekurave, ndërsa të tjerë i ka në Parlament që shpesh ju del në mbrojtje dhe bashkëpunon me ta në afera që rëndojnë në kurriz të qytetarëve shqiptare. Rama mund të hiqet sikur s’di gjë për Hysën, por ajo që ne dimë të themi është se libri i skocezit në bibliotekën e tij nuk është, por të paktën do mbajmë mend se nga takimi i tyre u dha “OK” për kazinonë tek Marina Bay.
