Mediat greke shkruajtën këtë të premte se Presidentja e re e Maqedonisë së Veriut pretendoi se mënyra e përdorimit të emrit të vendit është “një çështje e përcaktimit personal, një e drejtë e garantuar nga aktet më të larta se marrëveshjet dypalëshe”
Gordana Silianovska-Davkova, Presidentja e re e Maqedonisë së Veriut, deklaroi se respekton Marrëveshjen e Prespës, por ka të drejtën personale të përdorë termin “Maqedoni”, raportoi sot shtypi grek.
Silianovska, duke iu përgjigjur pyetjeve të gazetarëve në Ohër, theksoi se mënyra se si do të përdorë emrin e vendit është “një çështje e përcaktimit personal, një e drejtë e garantuar nga aktet më të larta se ato të zbatueshme në marrëveshjet dypalëshe”. Ajo shtoi se do të përpiqet përmes dialogut të bindë Greqinë për korrektësinë e qëndrimeve të saj dhe theksoi se ka një plan për këtë çështje. “Sigurisht që kam një plan. Plani është ndërtimi i marrëdhënieve të mira fqinjësore. Plani është të kesh respekt për veten. Dhe mendoj se, si në politikë, duhet kërkuar artin e së mundshmes. Së shpejti do ta bëjmë”, tha Silianovska.
Në lidhje me paralajmërimet greke për një ankesë në Gjykatën Ndërkombëtare të Drejtësisë për mosrespektimin e Marrëveshjes së Prespës, Silianovska kujtoi një vendim të mëparshëm të Gjykatës në vitin 2011 që ishte në favor të Maqedonisë.
“E njëjta Gjykatë Ndërkombëtare, në të cilën u përballëm me Greqinë, vendosi për shkelje të nenit 11 të Marrëveshjes së Përkohshme, që ishte gjithashtu një marrëveshje ndërkombëtare. Nuk mendoj se do të shkojmë menjëherë në gjykatë. Ka një gradim në Marrëveshjen e Prespës. Fillimisht vihet në dukje, diskutohet, pyetja i drejtohet edhe OKB-së dhe më pas shkon në gjykata. Vendimet e gjykatave duhet të jenë erga omnes (të zbatueshme për të gjithë), por në rastin tonë kjo nuk ka ndodhur”, tha Silianovska.
Silianovska, e zgjedhur presidente më 8 maj nga partia e djathtë VMRO-DPMNE, gjatë betimit më 12 maj e quajti vendin “Maqedonia” dhe jo “Maqedonia e Veriut”. Ky veprim shkaktoi reagime të forta nga Greqia dhe u kundërshtua nga BE dhe SHBA.
