Gjithmonë e më tepër janë duke u zbuluar detaje të reja për pushimin nga puna të infermierit Elson Jaçaj.
Një përgjim ka dal në dritë nga televizioni Ora News në të cilën shefi i Imazherisë në QSUT, Maks Basha, kërcënon Elson Jaçaj, infermierin që thirri kolegët e tij në protestë për kushtet, pagat, por dhe mangësitë e spitalit ku punon.
Kanë qenë pikërisht kritikat në lidhje me funksionimin e QSUT që e kanë çuar Bashën deri në kërcënimin e Jaçaj.
Ora News publikon ekskluzivisht audiopërgjimin mes infemierit dhe shefit të Imazherisë, i cili kërcënon Jaçajn që të mos ndërhyjë në problemet që kanë infermierët në punë, por të shohë pragun e shtëpisë së tij, gruan dhe djalin.
Përgjimi i plotë
Maks Basha: Je President i Shoqatës mo?
Elson Jaçaj: Po.
Maks Basha: Që kur?
Elson Jaçaj: Kam dy vite.
Maks Basha kërcënoi infermierin Jaçaj që të mos flasë publikisht për problemet e infermierëve në spitale, pagat e tyre, por të shohë vetëm derën e shtëpisë së tij.
Maks Basha: Elison shiko çunin, zonjën në shtëpi dhe asgjë tjetër.
Basha i kërkon Jaçajt që të përgënjeshtrojë statusin në faqen e tij në facebook.
Maks Basha: Fshiji urgjent këto ndjesa se janë ironike dhe në dëmin tënd. Më shfrytëzuan thuaj, rashë viktimë. Çoja të gjithëvë, të thashë, shiko shtëpinë tënde. Urgjent, fshije atë dhe bëj këtë, jo në formë ironike. Ishte më e rëndë kjo që kishe bërë, ta dish.
Shefi i Imazherisë vijon kërcënimin ndaj infermierit, ku i thotë se pagat do rriten kur të kenë mbështetje.
Maks Basha: Kur të rriten rrogat, nuk do rriten se do duan, do rriten kur të kenë mbështetje, të ardhura, nuk i bëjmë dot as unë, as ti.
Pas kësaj telefonate infermieri Jaçaj ka rikthyer statusin me ndjesën e tij, duke thënë se ndjesa u drejtohej personave që mendonin se mund ta përdornin për interesa personale.
Megjithatë, Elson Jaçaj, nuk ka ndalur së denoncuari problematikat me infemierët, ku më i fundit është ai për korrupsionin në provimin e licencave.
Sakaq, në datën 20 dhjetor, infermierët kanë njoftuar se do të ngrihen në protestë.
