Gjykata Themelore në Prishtinë – Departamenti për të Mitur ka shpallur fajtor një të rritur dhe tre të mitur për dhunimin e një 11-vjeçareje. I akuzuari E.R. është dënuar me 14 vite burg, ndërsa të miturit G.R., G.J., dhe Xh.S. janë dënuar secili me 7 vite burg.
Në njoftimin e gjykatës thuhet: “I akuzuari E.R. është shpallur fajtor për veprën penale të ‘Dhunimit’ dhe është dënuar me 14 vite burgim. Tre të miturit janë shpallur fajtorë për ‘Dhunim’ dhe ‘Keqpërdorim të Fëmijëve në Pornografi’, dhe secili është dënuar me 7 vite burgim.”
Gjykata gjithashtu ka veçuar procedurën për një tjetër të mitur, Sh.K.
E.R. dhe një nga të miturit janë liruar nga akuza për “Trafikim njerëzish” pasi nuk është provuar që kanë kryer këtë vepër penale.
Palët e dëmtuara janë udhëzuar për realizimin e kërkesave të tyre në një kontest të rregullt juridiko-civil. Të pakënaqurit kanë të drejtë ankese në Gjykatën e Apelit të Kosovës përmes Gjykatës Themelore në Prishtinë.
