Policia e Malësisë së Madhe ka goditur një rast të kultivimit të bimëve narkotike, në fshatin Gruemirë. Gjatë aksionit janë sekuestruar 373 fidanë dhe bimë narkotike, një sasi tjetër në proces tharjeje, si dhe municion luftarak. Autori i identifikuar si shtetasi me iniciale P.C., 49 vjeç është shpallur në kërkim nga uniformat blu.
Njoftimi i policisë:
Si rezultat i kontrolleve të imtësishme në të gjithë territorin e qarkut dhe punës së inteligjencës policore, në kuadër të megaoperacionit “Territor i pastër”, shërbimet e Komisariatit të Policisë Malësi e Madhe, në fshatin Gruemirë, gjetën të mbjella 321 fidanë dhe 52 bimë narkotike. Gjithashtu, në këtë territor, në ambientet e objekti në pronësi të shtetasit P. C., u gjetën disa bimë narkotike në proces tharjeje dhe një sasi municioni luftarak, të cilat u sekuestruan në cilësinë e provës materiale.
Nga veprimet hetimore për këtë rast u identifikua dhe u shpall në kërkim autori i dyshuar, shtetasi P. C., 49 vjeç. Vijon puna për kapjen e tij dhe për dokumentimin e plotë të kësaj veprimtarie kriminale.
