Në muajin nëntor të 2019 bëri bujë atentati ndaj prokurorit Arjan Ndoj në mbikalimin e Shkozetit. Nga atentati mbetën të plagosur Ndoj dhe Aleksandër Laho, i njohur ndryshe si Rrumi i Shijakut, dhe humbi jetën shoferi i prokurorit, Andi Maloku. Prokuroria e Posaçme ka mbyllur hetimet dhe ka çuar për gjykim dosjen në ngarkim të 6 personave, të akuzuar për atentatin ndaj ish-prokurorit Arjan Ndoj dhe “Rrumit të Shijakut”.
Ata janë Plaurent Dervishaj, Julian Meçaj, Bledar Polovina, Amar Shkëmbi (alias Dritan), Ramazan Rraja dhe Endrit Sinani dhe akuzohen për disa vepra penale. Të akuzuar si grup i strukturuar kriminal janë Plaurent Dervishaj, Julian Meçaj, Bledar Polovina, Amar Shkëmbi dhe Ramazan Rraja.
Sipas SPAK personat e sipërpërmendur, kanë qenë bashkëpunëtorë të të pandehurve Redian Rraja dhe Ariol Halilaj, të cilët kryen atentatin te mbikalimi i Shkozetit.
