Elmir Dashi, 40 vjeç, banues në Fier është vënë në pranga pasi ishte shpallur në kërkim për veprën penale “Falsifikimi i vulave, i stampave ose i formularëve”. Dashi, në periudhën 2012-2013, kur ka qenë i punësuar në zyrat e kompanisë për prodhimin dhe shpërndarjen e dokumenteve të identifikimit, (ALEAT), ka falsifikuar dokumentet e identifikimit të disa shtetasve me precedentë penale, kundrejt përfitimit. Për rrjedhojë, Gjykata e Fierit e ka dënuar me 3 vjet, 5 muaj e 1 ditë burgim. Çështja kaloi në Apel dhe në vitin 2018, Gjykata e Apelit Vlorë e ka dënuar me 4 vjet burgim, për kryerjen e veprës penale “Falsifikimi i vulave, stampave ose formulareve”, kryer në bashkëpunim. Më 16 mars, Dashi u kap në Itali dhe u ektradua drejt Shqiprisë, por nuk dihen rrethanat në të cilat ishte liruar, për tu riprangosur sot.
Njoftimi i policisë Fier:
Vijon megaoperacioni i koduar “Sundimi i ligjit”, për kapjen e shtetasve në kërkim. I dënuar me mbi 3 vjet burgim, për veprën penale “Falsifikimi i vulave, i stampave ose i formularëve”, kapet dhe vihet në pranga 40-vjeçari. Komisariati i Policisë Fier, në zbatim të planit të masave të megaoperacionit “Sundimi i ligjit”, bazuar dhe në informacionet e siguruara në rrugë operative, bëri të mundur lokalizimin dhe kapjen e shtetasit të shpallur në kërkim: Elmir Dashi, 40 vjeç, banues në Fier. Në bashkëpunim me Sektorin e Krimeve Ekonomike dhe Financiare, u bë ndalimi i këtij shtetasi, pasi Gjykata e Fierit e ka dënuar me 3 vjet, 5 muaj e 1 ditë burgim, për veprën penale “Falsifikim i vulave, i stampave ose i formularëve”. Ky shtetas, në periudhën 2012-2013, kur ka qenë i punësuar në zyrat e kompanisë për prodhimin dhe shpërndarjen e dokumenteve të identifikimit, ka falsifikuar dokumentet e identifikimit të disa shtetasve me precedentë penale, kundrejt përfitimit. Materialet procedurale i kaluan Prokurorisë, për veprime të mëtejshme.
