Policia greke ka bërë një arrestim të rëndësishëm në luftën kundër trafikut ndërkombëtar të drogës. Jasona Mërkuri, një 54-vjeçar shqiptar nga Patosi, është kapur me një sasi prej 210 kilogramësh kokainë në portin e Pires. Mërkuri, i cili besohet të jetë kreu i një rrjeti kriminal, është arrestuar nën akuzat e trafikut të lëndëve narkotike nga Amerika Latine në Europë.
Operacioni i ndalimit u krye në bashkëpunim të ngushtë me autoritetet ndërkombëtare të antidrogës dhe u bë i mundur falë një hetimi të gjatë që përfshiu përgjime dhe ndjekje të fshehta.
Jasona Mërkuri dhe bashkëpunëtorët e tij tani përballen me akuza të rënda, ndërsa hetimet vazhdojnë për të zbuluar më shumë lidhje dhe për të shkatërruar plotësisht rrjetin e trafikut të drogës. Autoritetet kanë bërë të ditur se janë të vendosura të vazhdojnë bashkëpunimin ndërkombëtar për të parandaluar dhe luftuar trafikimin e substancave narkotike që shkatërrojnë jetë dhe komunitete.
54-vjeçari me origjinë nga Patosi rezulton të jetë arrestuar në shtator 2009 në Fatih të Stambollit me 10 kg heroinë dhe 3 kg marijuanë.
Kur u arrestua, ai kishte 3 muaj që ishte liruar nga burgu ku mbahej për shitje droge. Mërkuri përdorte si vend magazinimi të drogës, banesën e shtetases Mimoza Zota në Fatih. Heroina e kapur gjatë operacionit që çoi në arrestimin e 7 personave përfshirë një grua, ishte destinuar për në Shqipëri, sipas medias së huaj.
Jasona Mërkuri alias Andrea Mërkuri alias Azdren Muharremi, rezultonte në kërkim në Greqi, i dënuar me 20 vjet burg si kreu i një grupi kriminal të cilit në 2017 iu kapën 634 mijë e 246 tableta droge “Captagon”, e njohur si “Droga e Xhihadistëve”.
