Sot po zhvillohet mbledhja e Komisionit Hetimor për Koncesionet në Shëndetësi, ku deputetët kanë debatuar për zgjerimin e objektit të hetimit. Deputeti Saimir Korreshi deklaroi se ky komision nuk ka të drejtë të ndryshojë apo zgjerojë objektin e hetimit, pasi për këtë çështje është vendosur nga 140 deputetët e Parlamentit.
“Ne nuk mund të dalim jashtë objektit. Jemi në Kuvend me një objekt që është miratuar. Problematika është çka votuar Kuvendi; nuk vendosim ne për të zgjeruar objektin. 140 deputetë e vendosën. Nëse doni zgjerim, t’i drejtohemi Kuvendit,” tha Korreshi.
Deputeti i Partisë së Lirisë, Petrit Vasili, po ashtu deklaroi se po dilet nga objekti i hetimit dhe propozoi që hetimi për problemet spitalore të fillojë nga viti 1992.
“Zgjatja e periudhës së këtij komisioni është e pakuptimtë. Në asnjë rast koncesioni nuk ka ekzistuar, as ka pasur nisma të caktuara për të bërë një zgjidhje koncensionare. Kjo zgjidhje është ideuar kur morën përsipër ta zgjidhnin këtë detyrë. Bëhet fjalë për një kontratë. Si është zbatuar kontrata? Pse është devijuar kontrata fillestare? Infeksionet spitalore janë një problem që kanë ekzistuar. Sterilizimi ka qenë një nga komponentët që ka pasur peshën periferike. Pesha themelore ishin mjediset spitalore dhe mbingarkesa dhe rezistenca ndaj antibiotikëve,” tha Vasili.
Debati në komision tregon përplasjet mes deputetëve lidhur me mënyrën dhe drejtimin e hetimeve për koncesionet në sektorin e shëndetësisë. Nëse do të kërkohet zgjerimi i objektit të hetimit, komisioni duhet t’i drejtohet Kuvendit për një vendim të ri.
