Të tjera detaje hedhin dritë mbi ngjarjen e rëndë të ndodhur orët e para të ditës së sotme, ku Aleks Marku mbajti peng dy fëmijët e mitur për disa orë. Në momentin që ka filluar të qëllojë me armë brenda shtëpisë, djali i madh 11 vjeç është përpjekur ta qetësojë të atin dhe ta mbajë larg vëllanë më të vogël.
Në pamjet e siguruara nga TopChannel, djali i lutet të atit ti dorëzojë armën, por 40-vjeçari nuk i përgjigjet dhe siç kuptohet nga pamjet nuk beson që është fëmija i tij. Në një moment djali teksa përpiqet ta qetësoje pasi i ati mendon se po e sulmojnë të panjohur, i drejtohet atij duk e siguruar se nuk ka njeri aty.
Biseda:
Djali: Babe, fale babën tim o burrë se falet çdo njeri. Mirë më thuaj po ose jo? Fale babin. Ti më mirë më thuaj po ose jo, mos rri duke folur aty. Ke me e fal? As me u afru këtu nuk ke punë fare. Për çfarë vjen këtu. Të jep babi besën, ma jep mua automatikun. Më fal.
Aleks Marku: Po vijnë brenda?!
Djali: Jo, jam unë këtu babi! Jam unë këtu o babi. Fale o Genc, fale o burrë. Në dorë ta jep automatikun. Vetëm fale…Jam unë o babi.
Aktualisht, 40-vjeçari ndodhet në ambientin e Komisiatit të Durrësit, ku po kryehen analizat për të përcaktuar nëse 40-vjeçari ka qenë në efektin e lëndëve psikotrope, ashtu siç pretendon edhe vetë duke theksuar disa herë se “nuk ka qenë i vetëdijshëm” në momentin kur ka qëlluar mbi efektivët e forcave RENEA. Marku portretizohet nga të afërmit e bashkëshortes si një person me probleme, që ushtronte edhe dhunë në familje, ndaj e shoqja kishte vendosur që të largohej drejt Italisë. Duke qenë se ajo është larguar, ai ka marrë fëmijët me forcë nga Lezha dhe është zhvendosur në Durrës. Probleme kishte edhe në Itali, ku ka qenë i dënuar për vjedhje.
