Anëtari i kryesisë së Partisë Demokratike të Shqipërisë, Belind Këlliçi, ka dalë sot para mediave për të bërë disa zbulime të rëndësishme mbi çështje korrupsioni që, sipas tij, përfshijnë Bashkinë e Tiranës dhe disa subjekte të tjera. Këlliçi, në një ton të vendosur, tha se ka dorëzuar një shkresë zyrtare me nr. prot. 271 më datë 3 nëntor 2023, ku ka informuar zyrtarisht Altin Dumanin mbi disa fakte të rënda penale.
Ai theksoi: “Në këtë informacion, kemi vënë në dijeni SPAK-un se Erion Veliaj, në bashkëpunim me Armand Lilin e famshëm për ndërtimin e 7 kateve pa leje në mes të Tiranës, kanë fallsifikuar dokumentacionin e pronës publike për ndërtimin e kompleksit ‘Square 21’.”
Këlliçi vazhdoi me akuzat, duke thënë se Veliaj ka favorizuar kompaninë “Arlis Ndërtim”, duke i dhënë leje të depozitojë dherat në landfillin e Sharrës pa pagesë, çka lidhet me një projekt të dyshuar si korruptiv. Ai shtoi se këto veprime shkelin ligjin dhe kanë krijuar një situatë ku pronë publike është përdorur për interesa private, duke i kursyer kësaj kompanie të paktën 1 milionë euro në kosto të depozitimit të dherave.
“Ditën e djeshme, u informuam për sekuestrimin e disa aseteve kriminale në kompleksin ‘Square 21’. Sot, dua të parashtroj disa fakte që lidhen me korrupsionin e Bashkisë Tiranë,” shtoi Këlliçi, duke nënvizuar seriozitetin e akuzave.
Këlliçi përfundoi deklaratën e tij me një thirrje për veprim: “I bëjmë thirrje SPAK-ut të administrojë të gjithë dokumentacionin e kompleksit ‘Square 21’, të administrojë të gjithë kontratat e shitjes, kontratat e kleringut dhe, si në rastin e Olti Bistrit, të sekuestrojë të gjithë asetet e fshehura të drejtorëve të Bashkisë Tiranë dhe vetë Erion Veliajt në këtë kompleks.”
