Kreu i Grupit Parlamentar të PD-së, Gazment Bardhi, deklaroi se kryeministri Edi Rama po mban peng integrimin europian të Shqipërisë dhe është i përfshirë në korrupsion.
“Ramës të gjithë bashkëpunëtorët i dalin hajdutë. Rama është i përfshirë edhe vetë në korrupsion. Kemi kryeministrin më të korruptuar në Europë. Integrimi europian është vonuar 11 vjet nga qeveria e korrupsionit të Ramës,” u shpreh Bardhi në një deklaratë për mediat.
Ai shtoi se Rama detyroi grupin e PS-së të mblidhej tek inceneratori, duke treguar që “Edi Rama më së paku nuk di të zgjedhë bashkëpunëtorët e tij.”
Sa i përket kërkesave të opozitës për përshpejtimin e anëtarësimit të Shqipërisë në BE, Bardhi theksoi rëndësinë e një qeverie teknike përpara zgjedhjeve, duke cituar raportet e OSBE/ODIHR për keqpërdorimin e burimeve shtetërore nga qeveria.
“Qeveria teknike ka qenë një kërkesë e vazhdueshme e PD-së, sepse raportet e OSBE/ODIHR flasin për keqpërdorim të burimeve shtetërore nga qeveria, intimidim dhe presion ndaj punonjësve të administratës publike, dhe përdorimin e fondeve publike për efekt të fushatës zgjedhore,” tha Bardhi.
Ai theksoi se vetëm një qeveri teknike jashtë kontrollit të partive do të krijonte barazi dhe kushte të ndershme në procesin zgjedhor.
