Ngjarja tronditëse e vetëvrasjes së Alma Arazit me 3 fëmijët e saj në lumin Buna ka qenë kryefjalë në media ditët e fundit. (Lexo këtu)
Gazetarja Klodiana Lala e ftuar në emisionin “Breaking” me Fiori Dardhën në Top News, foli mbi arsyet që mund ta kenë shtyrë 39 vjeçaren të ndërmerrte një akt të tillë. Sipas saj faji fillimisht është i shoqërisë sepse nuk kanë kuptuar thirrjet për ndihmë të bëra nga Alma Arrazi.
“Nuk dua të gjykoj viktimën sepse nuk kemi qenë në asnjë moment poshtë lëkurës së saj. Nuk i dimë rrethanat që e kanë çuar një grua në një akt aq tragjik. Ne si shoqëri jemi të gjithë fajtorë sepse ajo grua ka bërtitur për ndihmë dhe ne nuk e kemi parë. Familja nuk e ka parë se çfarë mund ta kishte shqetësuar”- tha Lala.
Më tej gazetarja shtoi se duke ndërmarrë një akt kaq tragjik, e ndjera duket sikur ka dashur të ndëshkojë bashkëshortin për tradhëtinë e tij.
“Fakti që kjo grua ndërmori një akt kaq tragjik, ajo që ne duhet të bëjmë është të ndërgjegjësojmë ato vajza dhe gra duke u thënë se nuk është kjo zgjidhja. Duket sikur është përpjekur të ndëshkojë bashkëshortin e saj. Duket një grua e lënduar për shkak të tradhëtisë por kjo nuk është arsye për të ndërmarrë një akt kaq ekstrem. Nuk është zgjidhje vetëvrasja.
Fëmijët kanë ndjekur në instiktin e tyre nënën që e kanë simbol të mbrojtjes. Duke u përpjekur ta shfajësojmë tërësisht 39 vjeçaren, ne po i bëjmë një dëm shoqërisë. Ne duhet t’u bëjmë thirrje vajzave dhe grave që nuk mund të zgjedhin këtë rrugë të shkurtër sepse kjo lë gjurmë të traumave tek njerëzit e tjerë”- shtoi gazetarja.
Tragjedia e 2 Majit
Ngjarja e rëndë ka ndodhur më 2 maj. Alma Arazi u vetëvra duke u hedhur në lumin Buna, bashkë me 3 fëmijët e saj të mitur, 2 vajza dhe 1 djalë. I dyshuar kryesor për krimin e rëndë është bashkëshorti i Alma Arazit, Ergys Arazi, babai i tre fëmijëve. Ai akuzohet se ka ushtruar dhunë në familje, gjë që ka shtyrë 39-vjeçaren drejt aktit të vetëflijimit. Ndërkohë që sherri në familje kishte nisur prej kohësh, pasi Alma Arazi zbuloi tradhtinë e bashkëshortit.
Deri më tani, 31-vjeçari ka mohuar të gjitha akuzat duke u mbrojtur me pretendimin se e shoqja vuante nga probleme të shëndetit mendor. Familjarët pretendojnë se Arazi kishte një lidhje tjetër jashtëmartesore, detaj që është marrë si pistë hetimi nga autoritetet.
