Roma ka nisur përgatitjet për ndeshjen e kthimit në gjysmëfinalen e UEFA Europa League kundër Bayer Leverkusen. Të hënën, trajneri Daniele De Rossi mori lajme të mira për Paulo Dybala-n.
Pasi u largua pas 45 minutave të para në ndeshjen kundër Juventus-it të dielën, ekzaminimet mjekësore treguan se argjentinasi nuk ka pësuar dëmtime serioze, por vetëm një tendosje muskulore. Dybala do të udhëtojë me skuadrën drejt Gjermanisë, dhe gjendja e tij do të menaxhohet me terapi.
Në “Bay Arena”, Roma do të kërkojë përmbysjen pas humbjes 0-2 në ndeshjen e parë në shtëpi. Në këtë pikë të sezonit, shumë gjëra varen nga kjo ndeshje, pasi në rast eliminimi, shansi për kualifikim në Champions League do të kalonte vetëm nëpërmjet kampionatit.
Me barazimin ndaj Juventus-it, Roma ka 60 pikë dhe përballet me Atalanta-n javën e ardhshme, në një ndeshje që do të përcaktojë shumë në lidhje me kualifikimin për në Champions League.
