Presidenti turk, Recep Tayyip Erdogan, tha të hënën se përshëndeti vendimin e grupit militant Hamas për të pranuar një armëpushim në Gaza, duke shtuar se kjo ishte bërë në përputhje me sugjerimin e Ankarasë. Ai shpreson që Izraeli të bëjë të njëjtën gjë.
“Ne e mirëpresim deklaratën e Hamasit se ata pranuan armëpushimin me sugjerimin tonë. Tani, Izraeli duhet të ndërmarrë të njëjtin hap,” tha Erdogan.
Turqia ka dënuar sulmet izraelite në Gaza, ka bërë thirrje për një armëpushim të menjëhershëm dhe ka ndaluar të gjithë tregtinë me Izraelin. Gjithashtu, Turqia ka vendosur t’i bashkohet kërkesës së Afrikës së Jugut që Izraeli të gjykohet për gjenocid në Gjykatën Ndërkombëtare të Drejtësisë (ICJ).
Duke folur pas një takimi të kabinetit, Erdogan u bëri thirrje vendeve perëndimore të rrisin presionin ndaj Izraelit për të pranuar armëpushimin.
Menjëherë pas kësaj, Erdogan postoi në rrjetin social X se kishte folur në telefon me kreun e Hamasit, Ismail Haniyeh, për vendimin e grupit militant për armëpushimin dhe përpjekjet për t’i dhënë fund luftimeve në Gaza.
“Gjatë bisedës, theksova se ishte pozitive që Hamasi pranoi armëpushimin me sugjerimin e Turqisë, dhe theksuam se Izraeli duhet të ndërmarrë hapa për një armëpushim të qëndrueshëm,” shkroi Erdogan.
