Presidenti i Shqipërisë, Bajram Begaj, u prit sot në Vatikan nga Papa Françesku. Kjo është hera e dytë që Presidenti Begaj takohet me Atin e Shenjtë, pas vizitës së tij të parë në dhjetor 2022.
Presidenti falënderoi përzemërsisht Papa Françeskun për mikpritjen dhe e përgëzoi për përkushtimin ndaj paqes, veçanërisht me thirrjet për t’i dhënë fund luftërave në Ukrainë dhe Lindjen e Mesme.
“Angazhimi i Papa Françeskut në përhapjen e paqes përmes mesazheve të drejtpërdrejta është i jashtëzakonshëm,” u shpreh Begaj.
Presidenti theksoi gjithashtu mbështetjen e Shqipërisë për zgjidhjen e konflikteve përmes dialogut:
“Shqipëria qëndron krah aleatëve perëndimorë për stabilitet dhe zhvillim të qëndrueshëm në Ballkan dhe më gjerë.”
Në shenjë mirënjohjeje, Presidenti Begaj i dhuroi Papa Françeskut një pikturë të Kishës së Kuvendit të Rubikut, një nga kishat më të vjetra në Ballkan dhe një ikonë e krishtërimit shqiptar.
